មានសត្វស្លាបចំនួន ៨ ប្រភេទ ត្រូវបានអង្គការសមាគមអភិរក្សសត្វព្រៃ ( WCS) ស្រាវជ្រាវ និង សិក្សារកឃើញថា ជាប្រភេទសត្វស្លាបកម្របំផុតនៅលើផែនដី ថែមទាំងជិតផុតពូជទៅហើយ ប៉ុន្តែពួកវាកំពុងតែសម្ងំលាក់ខ្លួនរស់នៅក្នុងទឹកដីប្រទេសកម្ពុជា ។
ប្រភេទសត្វស្លាប ដែលក្រុមអ្នកអភិរក្សសត្វព្រៃរកឃើញទាំង ៨ ប្រភេទ នៅកម្ពុជានោះរួមមាន ៖
ទី១ សត្វទាព្រៃស្លាបស ៖ សំបុកទាព្រៃស្លាបសនេះ ស្ថិតនៅក្នុងប្រហោងដើមគគីរ ដែលមានកម្ពស់ប្រមាណជា ១២ ម៉ែត្រពីដី និង មានទីតាំងស្ថិតនៅក្នុងដែនជម្រកសត្វព្រៃគូលែន ព្រហ្មទេព ក្បែរភូមិសំបូរ ឃុំស្រយ៉ោង ស្រុកគូលែន ខេត្តព្រះវិហារ។ ទាព្រៃស្លាបស ស្ថិតនៅក្នុងបញ្ជីក្រហមរបស់អង្គការ IUCN ជាប្រភេទរងគ្រោះជិតផុតពូជនៅលើសាកលលោក ពីព្រោះចំនួនរបស់ពួកវានៅបន្តធ្លាក់ចុះយ៉ាងខ្លាំង ដោយសារតែការបាត់បង់ទីជម្រក ការរំខាននៅតាមដងព្រែក និង ការបរបាញ់ជាដើម។ ទាព្រៃស្លាបស មានចំនួនចន្លោះ ២៥០ ដល់ ១០០០ ក្បាល នៅលើសាកលលោក និង មានវត្តមានតិចតួចរស់នៅក្នុងប្រទេសកម្ពុជា។
ទី២ សត្វត្រដក់តូច ៖ ត្រដក់តូចនេះ មានកម្ពស់រហូតដល់ ១៣០ សង់ទីម៉ែត្រ ហើយស្លាបទាំង សងខាងរបស់វាមានប្រវែង ជាង ២ ម៉ែត្រ ។ ទោះបីជាចំនួនរបស់ត្រដក់តូច នៅលើពិភពលោកត្រូវបានគេប៉ាន់ប្រមាណថា មានជាង១ម៉ឺនក្បាល ប៉ុន្តែចំនួននេះ កំពុងតែមានការធ្លាក់ចុះយ៉ាងខ្លាំងនៅតំបន់អាស៊ី។ ដូច្នេះហើយ វាត្រូវបានគេចាត់ទុកថា ជាប្រភេទងាយរងគ្រោះ ជាសាកលនៅលើបញ្ជីក្រហមរបស់អង្គការ IUCN ។
ទី៣ កូនសត្វក្ងោកទេព៖ សត្វខ្សឹប ឬ ក្ងោកទេព ជាប្រភេទសត្វរងគ្រោះជិតផុតពូជបំផុតក្នុងលោក ខណៈចំនួនរបស់វានៅទូទាំងពិភពលោក មានមិនដល់ ៨០០ ក្បាលនោះទេ។ កម្ពុជា គឺជាប្រទេសដ៏សំខាន់បំផុតមួយ ដើម្បីអភិរក្សសត្វខ្សឹបនេះកុំឱ្យបាត់បង់ ពោលគឺចំនួនសត្វខ្សឹបនៅក្នុងប្រទេសកម្ពុជានៅឆ្នាំ២០១២ មានប្រមាណជា ៤៣២ក្បាល ច្រើនជាងប្រទេសនានា។
ក្នុងនោះ ទីជម្រកវាលស្មៅនៃតំបន់ទំនាបទន្លេសាបក្នុងខេត្តកំពង់ធំ ជាកន្លែងដែលមានសត្វខ្សឹបរស់នៅច្រើនជាងគេបង្អស់ នៅលើសាកលលោក និង ជាកន្លែងដ៏សំខាន់បំផុត សម្រាប់ការរស់រានមានជីវិតរបស់ពួកវា។ ទី៤ សត្វត្រយ៉ងយក្ស, ទី៥ សត្វក្ងោក ,ទី៦ ត្រដក់ធំ ,ទី៧ សត្វត្មាត និង ទី៨ ត្រយ៉ងចង្កំកស ។ នេះបើយោងតាមរបាយការណ៍អង្គការ WCS ៕
ប្រភព https://www.popular.com.kh/social/93163.html/?fbclid=IwAR1DkmYLfrYk0_aca3DVisWdj6S-hl5V_u-P1RDXL1qz7b9fcF5MwV_pK7s
